काठमाडौं । नेपाली कांग्रेसका सभापति गगन थापाले पदबाट दिएको राजीनामा भोलि (शुक्रबार) बस्ने केन्द्रीय कार्यसमितिको बैठकले अस्वीकृत गर्ने भएको छ । शुक्रबार बस्ने केन्द्रीय कार्यसमिति बैठकमा सभापति थापा अनुपस्थित रहने भएपछि बैठकको अध्यक्षता उपसभापति शर्माले गर्ने छन् ।
२१ फागुनमा सम्पन्न निर्वाचनमा व्यहोर्नु परेको पराजयको नैतिक जिम्मेवारी लिँदै सभापति थापाले उपसभापति विश्वप्रकाश शर्मालाई बिहीबार राति राजीनामा पत्र बुझाएका थिए । उपसभापति शर्माले सञ्चालन गर्ने बैठकमा सभापति थापाले दिएको राजीनामावारे औपचारिक जानकारी गराइने छ । उक्त राजिनामा अस्वीकृत गर्ने प्रस्ताव पेस गरिने भोलि बस्ने बैठकको कार्यसूचिमा उल्लेख छ ।
भोलिको बैठकमा उपसभापति शर्माले चुनावी परिणामको जिम्मेवारी कुनै एउटा व्यक्तिले मात्र लिनु नपर्ने तर्कसहित राजीनामा अस्वीकृत गर्ने प्रस्ताव गर्ने छन् । ‘विशेष महाधिवेशनबाट चुनिएर आएको नयाँ नेतृत्वले चुनावका लागि निकै छोटो समय मात्र तयारी गर्न पाएको र पराजयको कारण एकल व्यक्ति नभएको निष्कर्षसहित बैठकमा प्रस्ताव लगिनेछ ।
पुस अन्तिम साता सम्पन्न विशेष महाधिवेशनबाट सभापतिमा निर्वाचित थापा २१ फागुनको निर्वाचनमा सर्लाही क्षेत्र नम्बर ४ बाट उम्मेदवार बनेका थिए । तर, उनी राष्ट्रिय स्वतन्त्र पार्टीका उम्मेदवार अमरेशकुमार सिंहसँग पराजित भए । विशेष महाधिवेशनबाट निर्वाचित भएका सबै पदाधिकारी निर्वाचनमा पराजित भएपछि थापामाथि नैतिक प्रश्न उठेको थियो ।
The post सभापति गगन थापाको राजीनामा भोलीको बैठकमा अस्वीकृत गरिने appeared first on राजधानी राष्ट्रिय दैनिक (लोकप्रिय राष्ट्रिय दैनिक)-RajdhaniDaily.com - Online Nepali News Portal-Latest Nepali Online News portal of Nepali Polities, economics, news, top stories, national, international, politics, sports, business, finance, entertainment, photo-gallery, audio, video and more....
