फागुन २१ गते हुने प्रतिनिधिसभा निर्वाचनका लागि भारत जोड्ने धनगढीको त्रिनगर, टीकापुरको सत्तीघाट र भाजनी नाका १७ गते रातीदेखि तीन दिनसम्म बन्द गरिने भएको छ ।
निर्वाचनको सुरक्षालाई ध्यानमा राखेर सोमबार राति १२ बजेदेखि भारत जोड्ने नाकाबन्द गरिने भएको हो । फागुन १८ गते राति १२ बजेदेखि फागुन २१ गते राति १२ बजेसम्म नाका बन्द गरिने जिल्ला प्रशासन कार्यालय कैलालीका सूचना अधिकारी शिवराज जोशीले बताएका छन् । निर्वाचनका बेला देशभरिका अन्तर्राष्ट्रिय नाका बन्द गरिने उनले बताए । कैलालीमा रहेका मुख्य तीन नाका त्रिनगर, भजनीको नाका र टीकापुरको सत्तीघाट नाका बन्द गरिने उनले बताए ।
नाकामा यातायातका साधन सञ्चालन तथा आवतजावतमा रोकलगाइएको उनको भनाइ छ ।
एम्बुलेन्स, ट्यांकर, दमकल, दूरसञ्चार सेवा, शववाहन, अस्पताल सेवा, विद्युतीय सेवाजस्ता अत्यावश्यक सेवाका गाडी, कूटनीतिक नियोगका सवारी साधन भने सञ्चालन गर्न अनुमती दिइने उनको भनाइ छ । अन्य सवारी सधानमा भने रोक लगाइने उनले बताए ।
जिल्ला प्रशासन कार्यालयले सूचना जारी गरेर नाका बन्द रहने जानकारी गराएको छ ।
कैलालीमा आगामी निर्वाचनलाई लक्षित गरेर प्रहरीले सीमा नाका तथा खुला सीमाना भएको क्षेत्रमा चेकजाँच र निगरानी बढाएको छ । यहाँ भारतसँग जोडिएको एक सय किलोमिटर खुला सीमाना रहेको छ ।
