काठमाडौं । ‘थ्रेसहोल्ड’ कटाएका ६ वटा राजनीतिक दलले समानुपातिकतर्फ प्राप्त गरेको सिटअनुसारका सांसदको नाम तय गरेका छन् । राष्ट्रिय स्वतन्त्र पार्टी (रास्वपा), नेपाली कांग्रेस, नेपाल कम्युनिस्ट पार्टी (एमाले), नेपाली कम्युनिस्ट पार्टी (नेकपा), श्रम संस्कृति पार्टी र राष्ट्रिय प्रजातन्त्र पार्टी (राप्रपा)का सांसदमात्र अब प्रतिनिधिसभामा हुने छन् । महावीर पुन स्वतन्त्र सांसदका रूपमा विजयी भएका छन् ।
रास्वपाले प्रत्यक्षमा १२५ र समानुपातिकतर्फ ५७ गरी १८२ सिट पाएको छ । कांग्रेसले प्रत्यक्षमा १८ र समानुपातिकतर्फ २० गरी ३८ सिट, एमालेले प्रत्यक्षमा ९ र समानुपातिकतर्फ १६ गरी २५ सिट, नेकपाले प्रत्यक्षमा ८ र समानुपातिकतर्फ ९ गरी १७ सिट पाएको छ । यसैगरी, श्रम संस्कृति पार्टीले प्रत्यक्षतर्फ ३ र समानुपातिकतर्फबाट ४ गरी ७ सिट, राप्रपाले प्रत्यक्षमा १, समानुपातिकतर्फ ४ गरी ५ सिट पाएको छ । एमालेले शनिबार नै समानुपातिकतर्फको नामावली टुंगो लगाइसकेको छ ।
रास्वपाले आइतबार सामानुपातिकर्फको नामावली टुंगो लगाए पनि सार्वजनिक गरेको छैन । समानुपातिकतर्फको सांसदको सिफारिस गर्न रास्वपाको ‘भर्चुअल’ बैठक बसेको थियो । सभापति रवि लामिछाने बिरामी भएकाले भौतिक रूपमा बैठक नबसी ‘भर्चुअल’ बसेर नामावली टुंगो लगाइएको हो ।
रास्वपा प्रवक्ता मनिष झाका अनुसार रुजु र प्रमाणित गरेपछि आयोग आफै ंले नाम सार्वजनिक गर्ने भएकाले पार्टीबाट सार्वजनिक नगर्ने निर्णय भएको हो । बैठकले ४८ जना महिला र ९ जना पुरुषको नाम आयोगमा सिफारिस गरेको छ । यसमा असआर्यतर्फबाट १७ जना, जनजाति तर्फबाट १६ जना, मधेशीबाट ९, दलितबाट ८, थारुबाट ४ र मुस्लिमबाट ३ जनाको नाम सिफारिस गरिएको छ ।
यी हुन् कांग्रेसका समानुपातिक सांसद
कांग्रेसले प्राप्त गरेको २० जना समानुपातिकतर्फका सांसदको नाम निर्वाचन आयोगमा सिफारिस गरेको छ । आइतबार बसेको केन्द्रीय कार्यसम्पादन समिति बैठकले २० सांसदको नाम सिफारिस गरेको हो । खस आर्य कोटाबाट सुशीला ढकाल, रुक्मिणीदेवी कोइराला, रिना उप्रेती, सीता थपलिया, गंगा शाही र अर्जुननरसिंह केसीको नाम सिफारिस भएका छन् । केसी सभापति गगन थापाका ससुरा हुन् ।
आदिवासी जनजाति कोटाबाट गीताकुमारी सेन्दाङ, गंगालक्ष्मी अवाल, गीता गुरुङ र रुनुका काउचा, सुनिताकुमारी सुवेदी र भीष्मराज आङ्देम्बेको नाम सिफारिस गरिएको छ । त्यस्तै, मधेशी कोटाबाट निनुकुमारी कर्ण, रेखाकुमारी यादव र डा. चन्द्र मोहन यादवको नाम सिफारिस भएको छ ।
यादव पूर्वराष्ट्रपति रामवरण यादवका छोरा हुन् । दलित कोटाबाट हरिनादेवी कामी, पवित्रा विक र मानबहादुर नेपाली रहेका छन् । त्यस्तै, थारूबा प्रमिलाकुमारी गच्छदार र मुस्लिमबाट शाहजान खातुनको नाम सिफारिस भएको छ ।
राप्रपामा खुस्बु, ताहिरसहित अरू को को ?
राप्रपाले समानुपातिकतर्फ ४ जना सांसद नाम निर्वाचन आयोगमा सिफारिस गरेको छ । केन्द्रीय कार्यसम्पादन समितिको बैठकले समानुपातिक ४ सिटका लागि नाम सिफारिस गरेको प्रवक्ता मोहन श्रेष्ठले जनाएका छन् । खस आर्य पुरुषतर्फ महोत्तरीका भरत गिरी, मुस्लिम पुरुषतर्फ रुपन्देहीका ताहिर अली, खस आर्य महिलातर्फ झापाकी खुस्बु ओली र जनजाति महिलातर्फ धादिङकी सरस्वती लामाको नाम राप्रपाले सिफारिस गरेको छ ।
श्रम संस्कृतिबाट को ?
श्रम संस्कृति पार्टीले समानुपातिक सांसदको टुंगो लगाएको छ । आइतबार धरानमा बसेको बैठकले निर्वाचन आयोगमा नाम सिफारिस गरेको हो । समानुपातिक प्रणालीअन्तर्गत सिफारिस गरिएका उम्मेदवारहरूको नाम पार्टीको निर्णयअनुसार टुंग्याएको अध्यक्ष हर्क साम्पाङले जनाएका छन् । उनका अनुसार आदिवासी जनजातिबाट पूर्णप्रसाद लिम्बू, खस आर्यबाट अम्बिकादेवी सङ्ग्रौला, दलितबाट राधिका रम्तेल र मधेशीबाट रुवी कुमारी ठाकुर रहेका छन् ।
नेकपाबाट को–को परे ?
नेकपाले निर्वाचन आयोगलाई समानुपातिकतर्फका सांसद सिफारिस गरेको छ । नेकपाले ५ जना पुरुष र ४ महिलाको नाम निर्वाचन आयोगमा सिफारिस गरेको छ । बलावती शर्मा, प्रमेश हमाल, प्रेमबहादुर बयक, भीमकुमारी बुढा, परशुराम तामाङ, जोगकुमार बर्बरिया यादव, गणेश विश्वकर्मा, पार्वती विश्वकर्मा र निराशा चौधरी डगौरा रहेका छन् ।
नेकपाले निर्वाचन आयोगलाई बुझाएको समानुपातिकतर्फका सांसदको सूचीमा सहसंयोजक माधवकुमार नेपाल पक्षका दुई जनामात्रै परेका छन् । नेता नेपाल पक्षबाट प्रमेश हमाल र गणेश विश्वकर्मा समेटिएका हुन् । एकीकृत समाजवादी छँदा हमाल वरिष्ठ नेतामध्ये थिए ।
गणेश विश्वकर्मा यसअघि सुदूरपश्चिम प्रदेशको नीति तथा योजना आयोगको उपाध्यक्षसमेत भइसकेका हुन् । योसँगै नेकपाको कूल सांसद संख्यामा नेपाल पक्षको हिस्सा ३ जना रहेको छ । सहसंयोजक नेपाल पक्षका धनबहादुर बूढा डोल्पाबाट प्रत्यक्ष निर्वाचित भएका छन् । माधव आफै भने निर्वाचित हुन सकेनन् ।
The post कांग्रेस समानुपातिकमा सभापतिका ज्वाइँदेखि पूर्वराष्ट्रपतिका छोरासम्म appeared first on राजधानी राष्ट्रिय दैनिक (लोकप्रिय राष्ट्रिय दैनिक)-RajdhaniDaily.com - Online Nepali News Portal-Latest Nepali Online News portal of Nepali Polities, economics, news, top stories, national, international, politics, sports, business, finance, entertainment, photo-gallery, audio, video and more....