धनगढी । राष्ट्रिय स्वतन्त्र पार्टी रास्वपाले कैलाली र कञ्चनपुरका आठवटै निर्वाचन क्षेत्रमा ‘क्लिन स्वीप’ गरेको छ । कैलालीका पाँच र कञ्चनपुरका तीनवटै क्षेत्रमा रास्वपाले भारी मतान्तरको जित निकालेको हो । यस्तै पहाडी जिल्ला डडेल्धुरा र बैतडीमा पनि रास्वपा उम्मेदवार विजयी भएका छन् ।
कैलाली–कञ्चनपुरमा ‘क्लिन स्वीप’ गर्दै रास्वपाले १० सिट, एमाले र काग्रेसले ३–३ जित्यो नेकपा नील
यो सगै रास्वपाले सुदूरपश्चिमका नौ जिल्ला रहेका १६ निर्वाचन क्षेत्रमध्ये १० सिट जितेको छ भने एमाले र काग्रेसले ३÷३ सिटमा विजय हासिल गरेका छन् । उता नेपाली कम्युनिस्ट पार्टी (नेकपा) भने कुनै क्षेत्रमा विजय हासिल गर्न नसकेर नील भएको छ ।
एमालेले बझाङ, दार्चुला र अछाम क्षेत्र नम्बर २ मा जितेको छ भने काग्रेसले बाजुरा, डोटी र अछाम क्षेत्र नम्बर १ मा जितेको छ ।
कैलाली निर्वाचन क्षेत्र नम्बर १ मा रास्वपाकी कोमल ज्ञवाली १७ हजार ८२६ मतसहित विजयी भइन् । नागरिक उन्मुक्ति पार्टीबाट राजनीति सुरु गरेकी उनी उम्मेदवारी दर्ताको केही समयअघि मात्रै रास्वपा प्रवेश गरेकी थिइन् । उनले कांग्रेसका जनकराज चौधरी र टीकापुरको मेयरबाट राजीनामा दिएर नेकपा उम्मेदवार बनेका रामलाल डगौरा थारुलाई भारी मतान्तरले पराजित गरेकी हुन् ।
कैलाली– २ मा रास्वपाकै केपी खनाल विजयी भएका छन् । सरसफाइ अभियन्ताको पहिचान बनाएका खनाल २६ वर्षको उमेरमा संसदीय यात्रा आरम्भ गर्न सफल भए । उनी बालेन शाहपछि रास्वपा प्रवेश भएका थिए । उनी शाहनिकट मानिन्छन् । खनालले एमालेका सूर्यबहादुर थापा, कांग्रेसका विजय स्वाँर र नाउपा नेपालका पतिराम चौधरीलगायतका उम्मेदवारलाई पराजित गरेका छन् ।
कैलाली ३ मा रास्वपाका जगतप्रसाद जोशी निर्वाचित भएका छन् । राष्ट्रिय जनमोर्चाबाट स्थानीय तह, प्रदेश र प्रतिनिधिसभाको चुनाव लडेका जोशी यसपटक रास्वपाबाट उम्मेदवार भएर विजयी भएका हुन् । उनले २० हजार ३५९ मत ल्याएका छन् । उनका निकटतम प्रतिद्वन्द्वी नेकपाका वीरमान चौधरीले ११ हजार ९८३ मत ल्याए । कांग्रेसका भीम बडुवालले ९ हजार ७०६ मत ल्याए । एमालेका गौरीशंकर चौधरीको त धरौटी नै जफत भएको छ ।
कैलाली– ४ मा रास्वपाकै खेमराज कोइराला विजयी भए । विद्यार्थीकालमा गजलकारको पहिचान बनाएका उनी राजनीतिमा यसअघि देखिएका थिएनन् । कोइराला २८ हजार ५५६ मत ल्याउँदै विजयी भएका हुन् । उक्त क्षेत्रमा नेपाली कांग्रेसका गोरखबहादुर विष्टले ११ हजार ३०१ मत लिए । नेकपा एमालेका उपमहासचिव लेखराज भट्ट तेस्रो बने । उनले ९ हजार ४४४ मत ल्याए । कैलाली निर्वाचन क्षेत्र ४ बाट चुनाव लड्दै आएका लेखराज एक चुनाव बिराएर जित निकाल्न सफल हुँदै आएका थिए । तर, यसपटकको पराजयले उनको निरन्तर हार भएको छ । २०७९ सालको निर्वाचनमा भट्ट कांग्रेसका वीरबहादुर बलायरसँग पराजित भएका थिए ।
कांग्रेसले आफ्नो गढ बताउँदै आएको कैलाली– ५ मा यसपटक रास्वपा उम्मेदवार आनन्दबहादुर चन्द निर्वाचित भए । उनी शिक्षा, स्वास्थ्य र अनुसन्धानका क्षेत्रमा सक्रिय थिए । जिल्लास्तरमा परिचित नभएका उनलाई एकाएक रास्वपाले उम्मेदवार बनाएको थियो । चन्द ३१ हजार ९५३ मत प्राप्त गर्दै विजयी भए । उनका निकटतम प्रतिद्वन्द्वी नेपाली कांग्रेसका नरनारायण शाहले ११ हजार ९५८ मत ल्याए । यसैगरी, नेपाली कम्युनिस्ट पार्टी नेकपाका प्रेमबहादुर आलेले ७ हजार ८७६ र नेकपा एमालेका उम्मेदवार यज्ञराज ढुंगानाले ५ हजार ८३९ मत प्राप्त गरे ।
कञ्चनपुर–१ मा रास्वपाका जनकसिंह धामी फराकिलो मतान्तरले विजयी भए । धामीले नेकपाकी बिना मगर एमालेका तारा लामा तामाङलाई पराजित गरे । धामीले २४ हजार ३३२ मत प्राप्त गर्दा उनका प्रतिद्वन्द्वी मगरले ११ हजार ११० मत प्राप्त गरेकी छन् । नेपाली कांग्रेसका गोपीप्रसाद उपाध्यायले आठ हजार ४६७ मत प्राप्त गरेका छन् । एमालेका तामाङले आठ हजार ८८ मत प्राप्त गरे ।
यस्तै, कञ्चनपुर–२ मा पनि रास्वपाका दीपक बोहरा भारी मतान्तरले विजयी भए । उनी पूर्वपत्रकार हुन् । रास्वपा सभापति रवि लामिछानेका दाइने हात मानिने बोहराले डेढ दशक पत्रकारिता गरेका छन् । बोहरा कांग्रेस नेता पूर्वमन्त्री एनपी साउदलाई २३ हजार १२५ मतान्तरले पराजित गर्दै विजयी भए । उनले ३३ हजार ९५२ मत प्राप्त गरे । साउदले १० हजार ८२७ मत प्राप्त गरेका छन् ।
यस्तै, कञ्चनपुर–३ मा रास्वपाका ज्ञानेन्द्रसिंह महता निर्वाचित भएका छन् । महता पनि पूर्वपत्रकार हुन् । ग्यालेक्सी टेलिभिजनमा काम गरेका उनले पत्रकारिता छोडेर राजनीति सुरु गरेका थिए । उनी रास्वपा सुदूरपश्चिमका संस्थापक इञ्चार्ज पनि हुन् । महताले २७ हजार ११८ मत प्राप्त गर्दा कांग्रेसका हरिप्रसाद बोहराले ९ हजार ४४३ मत प्राप्त गरेका छन् ।
उता डडेल्धुरामा पनि रास्वपाले कांग्रेसको किल्ला भत्कायो । त्यहाँ रास्वपाका उम्मेदवार ताराप्रसाद जोशी विजयी भए । उनले १९ हजार १३१ मत प्राप्त गरेका छन् भने प्रतिद्वन्द्वी नेपाली कांग्रेसका नैनसिंह महरले १२ हजार १२१ मत पाए । २०४८ सालदेखि २०७९ सालसम्म भएका सात निर्वाचनमा डडेल्धुरा कांग्रेसका शेरबहादुर देउवा विजयी भएका थिए । ३४ वर्षे कांग्रेस विरासत तोडेका जोशी गन्यापधुरा गाउँपालिका–२ का स्थायी बासिन्दा हुन् । उनी २०४८ मा शिक्षण पेसामा आबद्ध भएका थिए । उनी एमाले, एकीकृत समाजवादी र स्वतन्त्रहुँदै रास्वपा प्रवेश गरेका हुन् । स्वतन्त्रबाट प्रदेशसभामा विजयी भएका उनी राजीनामा दिएर उम्मेदवार बनेका थिए ।
उता बैतडीमा पनि रास्वपा विजयी भएको छ । रास्वपाका हरिमोहन भण्डारीले २२ हजार १३४ मत पाएर विजयी भए । उनले नेपाल क्रिकेट संघका अध्यक्षसमेत रहेका कांग्रेस उम्मेदवार चतुरबहादुर चन्द र बैतडीबाटै जितको ह्याट्रिक गरिसकेका एमालेका दामोदर भण्डारीलाई पराजित गरे । विजयी भएका भण्डारीको राजनीतिक पृष्ठभूमि भने कांग्रेस हो । उनी २०७४ मा कांग्रेसबाटै र २०७९ को निर्वाचनमा स्वतन्त्रबाट प्रदेशसभा उम्मेदवारी दिएका थिए । दुईपटक नै पराजित भएका भण्डारी यसपटक विजयी भएका हुन् ।
रास्वपाबाट दार्चुला, बझाङ, बाजुरा, डोटी र अछामका दुवै क्षेत्रमा उम्मेदवार रहेकाहरू भने पराजित भएका छन् ।
The post सुदूरपश्चिमका १६ वटै निर्वाचन क्षेत्रको मतगणना सम्पन्न appeared first on राजधानी राष्ट्रिय दैनिक (लोकप्रिय राष्ट्रिय दैनिक)-RajdhaniDaily.com - Online Nepali News Portal-Latest Nepali Online News portal of Nepali Polities, economics, news, top stories, national, international, politics, sports, business, finance, entertainment, photo-gallery, audio, video and more....