म्याग्दी।
हिमाली जिल्ला म्याग्दीमा बिहीबार सम्पन्न प्रतिनिधि सभा सदस्य पदको निर्वाचनमा कुल ५४ दशमलव २७ प्रतिशत अर्थात् ४६ हजार ८ सय ९३ मत खसेको छ । आज बिहान ७ बजेदेखि साँझ ५ बजेसम्म शान्तिपूर्ण रुपमा चलेको मतदानको कार्यबाट सो परिमाणमा मत खसेको हो ।
खसेको मतमध्ये यसपटक भएको प्रतिनिधि सभाको निर्वाचन अन्तर्गत जिल्लामा कुल मतदातामध्ये महिला २५ हजार १ सय १८, पुरुष २१ हजार ७ सय ७४ सय र अन्यतर्फ १ जना रहेको जिल्ला प्रहरी कार्यालय म्याग्दीले जनाएको छ । अहिले जिल्लाको बेनी नगरपालिकासहित पाँचवटै गाउँपालिकामा रहेका मतदान केन्द्रबाट मतपेटिका सङ्कलनको काम भैरहेको जिल्ला प्रहरी कार्यालय म्याग्दीका सूचना अधिकारी सागर तिमिल्सिनाले बताउनुभयो ।
यो समाचार तयार पार्दासम्म जिल्लाको धवलागिरि गाउँपालिका, रघुगंगाको कुईनेमङ्गले र अन्नपूर्णको नांगी, राम्चेलगायत ठाउँबाट मतपेटिकाहरु सदरमुकाम आउने क्रममा रहेको प्रहरी नायव उपरीक्षक सूर्यबहादुर थापाले बताउनुभयो । वैदेशिक रोजगारी, बाहिरी जिल्लामा बढ्दो बसाइँसराइ तथा अन्य विभिन्न कारणले गर्दा कुल मतको ४५ दशमलव ७३ प्रतिशत मत खस्न सकेन । जिल्लामा अनुमान गरेभन्दा ५–७ प्रतिशत मत कम खसेको जनाइएको छ । निर्वाचन आयोगले बनाएको निर्वाचन कार्यतालिका अनुसार बिहान ७ बजेदेखि जारी मतदानमा सबै मतदान केन्द्रमा विवादरहित तरिकाले मतदानको कार्य सम्पन्न भएको छ ।
मुख्य निर्वाचन अधिकृत सूर्यबहादुर थापाले मतदानलाई शान्तिपूर्ण रुपमा सम्पन्न गर्न सघाउने सबैलाई धन्यवाद दिँदै राति अबेरसम्म जिल्लाको टाढा रहेका मतदान केन्द्रबाट पनि मतपेटिका सदरमुकाम बेनीमा आइपुग्ने जानकारी दिनुभयो । उहाँका अनुसार सबै मतपेटिकाहरु मुख्य निर्वाचन अधिकृतको कार्यालयमा आइसकेपछि शुक्रवार बिहान सर्वदलीय तथा सर्वपक्षीय वैठक बसेर मतगणनाको काम अगाडि बढाइने भएको छ । सुरक्षा व्यवस्था चुस्त, दुरुस्त र प्रभावकारी बनाइएको हुँदा बिहानैदेखि शान्तिपूर्ण रुपमा मतदान प्रक्रिया सम्पन्न भएको मुख्य निर्वाचन अधिकृतको कार्यालयले जनाएको छ ।
म्याग्दीका सबै मतदानस्थलमा अपाङ्गता भएका व्यक्ति, ज्येष्ठनागरिक, शारिरीक रुपमा अशक्त, गर्भवती महिला र बिरामीलाई मतदान गर्नको लागि प्राथमिकता दिइएको थियो । विगतको समयका निर्वाचनमा जस्तो यसपटक भने झडप तथा विवादजन्य गतिविधिहरु निर्वाचन अवधिभर नदेखिएको तथा विवादलाई समाधान गर्न सफल भएको म्याग्दीका प्रमुख जिल्ला अधिकारी रवीन्द्र आचार्यले बताउनुभयो ।
म्याग्दी जिल्लामा कुल ८२ वटा मतदानस्थल र १ सय २० वटा मतदान केन्द्रमा गरी कुल ८६ हजार ३ सय ९७ जना मतदाताहरु रहेका थिए । जिल्ला निर्वाचन अधिकारी बिमलप्रसाद गौतमले दिएको जानकारी अनुसार मुख्यअधिकृतको निर्वाचनको कार्यालय रहेको जिल्ला समन्वय समितिको सभाहलमा मतगणनास्थल र कार्यालयका अन्य कोठामा समानुपातिक तथा प्रत्यक्षतर्फको मतपेटिकाहरु ल्याएर छुट्टाछुट्टै राख्ने व्यवस्था मिलाइएको छ । पहिलो चरणमा प्रत्यक्षतर्फको मतगणना सम्पन्न गरिसकेपछि समानुपातिकको मतगणना हुनेछ । म्याग्दीमा राजनीतिक दलसहित स्वतन्त्र गरी जम्मा १२ जना उम्मेदवारहरु निर्वाचनमा सहभागी भएका छन् ।