सभामुखको व्यवहारप्रति सांसदको प्रश्नैप्रश्न

काठमाडौं । विपक्षी दलका सांसदहरुले प्रतिनिधि सभाका सभामुख डोलप्रसाद अर्याल (डीपी) माथि निष्पक्ष व्यवहार नदेखाएको आरोप लगाएका छन् । सभामुखको व्यवहार निष्पक्ष नभएको भन्दै श्रम संस्कृति पार्टीका अध्यक्ष एवं संसदीय दलका नेता हर्क साम्पाङ राईले संसद् वैठक नै बहिष्कार गरेका छन् ।

राईले गरे संसद् वैठक बहिष्कार

बुधबार बसेको प्रतिनिधिसभा वैठकमा राईले प्रधानमन्त्री वालेन्द्र शाह (वालेन)लाई संसद्मा उपस्थित गराउन सभामुखले रुलिङ गर्नुपर्ने माग गरे । तर सभामुख अर्यालले जवाफबाट रुष्ट हुँदै राईले आफ्नो कालो झोला बोकेर बैठक कक्षबाट नै बाहिरिए ।

बैठक सुरु भएलगत्तै राईले प्रधानमन्त्रीलाई जवाफदेही बनाउनुपर्ने मागसहित पर्चा प्रदर्शन गरेका थिए । उनले सभामुखले प्रधानमन्त्रीलाई सदनमा बोलाउन स्पष्ट रुलिङ गर्नुपर्ने बताएका थिए ।

तर सभामुख अर्यालले ‘सभामुखले के विषयमा रुलिङ गर्ने, नगर्ने भनेर सिकाइरहनु पर्दैन’ भन्ने जवाफ दिएपछि स्थिति तनावपूर्ण बनेको थियो । त्यसपछि राईले संसद् बैठक छाडेर बाहिरिएका हुन् । प्रधानमन्त्रीको निरन्तर अनुपस्थितिलाई लिएर संसद्भित्र दबाब र विरोध बढ्दै गएको छ ।

मंगलबार बसेको प्रतिनिधिसभा बैठकमा राईले प्रधानमन्त्रीको निरन्तर अनुपस्थितिप्रति आपत्ति जनाउँदै सभामुख अर्यालको ध्यानाकर्षण गराएका थिए । उनले आफूहरूले पटक–पटक प्रधानमन्त्रीसँग जवाफ मागिरहेको तर बेवास्ता भइरहेको आरोप लगाए ।

सभामुख अर्यालले यस विषयमा अघिल्लो दिन पनि छलफल भएको जानकारी दिएका थिए । तर राई त्यसमा सन्तुष्ट देखिएनन् । उनले प्रधानमन्त्री संसद्मा उपस्थित भएर जवाफ दिनुपर्ने माग राख्दै अन्यथा आफूलाई नै बैठकबाट निकाल्न आग्रह समेत गरेका थिए ।

प्रतिनिधिसभा नियमावलीको नियम १५ को उपनियम २ अनुसार प्रधानमन्त्री वा सम्बन्धित मन्त्रीले संसद्मा उठेका प्रश्नको सात दिनभित्र जवाफ दिनुपर्ने व्यवस्था रहेको राईले स्मरण गराए । उक्त व्यवस्था प्रधानमन्त्रीले पालना नगरेको उनको आरोप थियो ।

यसअघि पटक–पटक प्रधानमन्त्री, गृहमन्त्री र रक्षामन्त्रीसँग सम्बन्धित प्रश्न संसद्मा बोल्ने सांसदहरूले उठाइरहेका छन् । यी तीनै मन्त्रालयको जिम्मेवारीमा रहेका प्रधानमन्त्री शाहले एकपटक पनि संसदमा जवाफ दिएका छैनन् ।

यही प्रश्नहरु सांसदले उठाउँदै गर्दा सभामुखले दिएको जवाफ र गरेको व्यवहारबाट राई सहितका सांसदहरु रुष्ट छन् । ‘नेपालको संविधान, हाम्रो नियमावली, अभ्यास आदिलाई हेर्दा मान्य सदस्यहरूले हलबाट सभामुखलाई कुन विषयमा रुलिङ गर्ने ? कसलाई गर्ने, कसलाई नगर्ने ? यसरी गर्नुस् भनेर सभामुखलाई भन्नै अभ्यास छ जस्तो लाग्दैन । नेपालको संविधान, कानुन, ऐन, नियमावली सबै हेर्दा सभामुखले उचित ठानेमा आफूले त्यसको निर्णय लिने सभामुखको जिम्मेवारी होला,’ सभामुख अर्यालले भने ।

सरकारले संसदमा पेस गरेको नीति तथा कार्यक्रममा राष्ट्रपति रामचन्द्र पौडेलले प्रस्तुत गर्दैगर्दा प्रधानमन्त्री शाह बीचमै उठेर हिडेका थिए । त्यसयता उनी संसद्मा सहभागि नभएपछि उनको खोजी र जवाफ माग गर्दै सांसदहरुले प्रश्न उठाइरहेका छन् । तर मंगलबार बसेको बैठकमा सभामुख अर्याल सहित राष्ट्रिय स्वतन्त्र पार्टी (रास्वप)का महासचिव एवं मुख्य सचेतक कविन्द्र बुर्लाकोटी प्रधानमन्त्री सात दिनभित्रमा संसद्मा सहभागि हुने आश्वासन दिएका थिए ।

नेपाली कांग्रेसकी प्रमुख सचेतक बासना थापाले पनि सभामुखको भूमिकामाथि प्रश्न उठाइन् । संविधानसम्मत ढंगले प्रधानमन्त्री संसदमा आउनुपर्छ भन्दै विपक्षीले निरन्तर माग राखिरहँदा त्यस’bout सभामुख गम्भीर नभएको उनको आरोप छ ।
नेपाल कम्युनिष्ट पार्टी (एमाले) प्रमुख सचेतक ऐनबहादुर महरले प्रधानमन्त्री शाहलाई किन खोपीको देवता बनाउन खोजिँदै छ भन्दै जंगिएका थिए । उनले निर्वाचित संसदको उपहास गरिरहँदा सभामुखले रुलिङ गर्न नसकी निरीहता देखाएको आरोप समेत लगाए । शून्य समयमा राष्ट्रिय महत्वका विषयहरू उठिरहेको हुँदा प्रधानमन्त्रीले तत्काल आएर जवाफ दिनुपर्ने उनको भनाई रहेको थियो ।

श्रम संस्कृति पार्टीका सांसद आरेन राई, सम्मानित सदनमा उठेका सवालमाथि प्रधानमन्त्री शाहले जवाफ दिए नयाँ पुस्तामा नजिर स्थापित भएर जाने बताए । उनले सदनमा प्रधानमन्त्री खोजी रहँदा नआउनुमा कतै संविधान नै नमानेको हो कि भनेर संशय समेत व्यक्त गरे ।

राप्रपाकी प्रमुख सचेतक खुश्बु ओलीले सदनले प्रधानमन्त्रीको दृष्टिकोण सुन्न चाहिरहेको र त्यसले ऊर्जा दिनेसमेत बताइन् । उनले पनि निरन्तर सभामुखलाई सम्बोधन गरेरै भूमिका सन्तुलित हुन नसकेको जिकिर समेत गरिन् ।

The post सभामुखको व्यवहारप्रति सांसदको प्रश्नैप्रश्न appeared first on राजधानी राष्ट्रिय दैनिक (लोकप्रिय राष्ट्रिय दैनिक)-RajdhaniDaily.com - Online Nepali News Portal-Latest Nepali Online News portal of Nepali Polities, economics, news, top stories, national, international, politics, sports, business, finance, entertainment, photo-gallery, audio, video and more....