नेपाल चलचित्र कलाकार संघको अध्यक्ष पदमा कलाकार उत्तम केसी निर्वाचित भएका छन्।
नया नेतृत्वका लागि आइतवार राजधानीमा सम्पन्न संघको केन्द्रीय कार्यसमिति निर्वाचनमा अभिनेता केसी २ सय १६ मत ल्याई अध्यक्ष पदमा विजयी भएका हुन्। कुल ३ सय ५६ मत खसेको निर्वाचनमा केसी ८४ मतान्तरले विजयी भएका हुन्। उनका एक मात्र प्रतिद्वन्द्वी सविन श्रेष्ठले १ सय ३२ मत पाएका थिए।
आइतवार मध्यराती सम्पन्न निर्वाचनको अन्तिम नतिजाअनुसार अधिकांश प्रमुख पदमा उत्तम केसी नेतृत्वको प्यानलका उम्मेदवार विजयी भएका छन्। केसीको प्यानलबाट उपाध्यक्षमा शिवहरि नेपाल (बैरागी) १ सय ४६ मतसहित विजयी भए। अर्को उपाध्यक्ष पदमा पूजना प्रधान १ सय ४४ मतसहित विजयी भइन्। उपाध्यक्ष पदका अन्य उम्मेदवारमध्ये सविनको प्यानलका उम्मेदवार पनाह अधिकारीले १ सय ३५ र उद्धव भट्टराईले १ सय ७ तथा स्वतन्त्र उम्मेदवार डिबी तामाङले १६ र राजेन्द्र बस्नेतले १८ मत पाएका थिए।
महासचिव पदमा उत्तमको प्यानलबाट सुनिल कटुवालले १ सय ९५ मतसहित विजयी ह“ुदै रामेश्वर बुर्लाकोटीलाई ७० मतान्तरले हराए। सचिव पदमा पनि उत्तमको प्यानलका गोपाल ढकाल २ सय १४ मतसहित विजयी हु“दै पल्पसा डंगोललाई १ सय ४ मतले पराजित गरे।
कोषाध्यक्षमा पनि उत्तमकै पक्षका तेजुला (तेजकुमारी) खतिवडा १ सय ४९ मतसहित विजयी भइन्। उनले निटकतम प्रतिद्वन्द्वी पवित्रा आचार्यलाई ४३ मतले पछाडि पारिन्। सह–कोषाध्यक्ष पदमा भने सविन श्रेष्ठ प्यानलका पवन केसी १ सय ६१ मतसहित विजयी हुदै उत्तमको पक्षकी गीता नेपाल शारदालाई ८ मतले पराजित गरे।
यस निर्वाचनमा सदस्य पदबाहेकका ७ मध्ये ६ पदमा उत्तम केसी नेतृत्वको प्यानल विजयी भएको छ भने केवल एक पद सह–कोषाध्यक्षमा सविन श्रेष्ठ प्यानलले सफलता हात पारेको छ। सदस्य पदमा भने उत्तमको प्यानलबाट इन्द्रबहादुर लामा (खम्बे), चन्द्रकला (मोनिका) दाहाल, चन्द्रकला राई (संगम), जीवन थापा, दमन रुपाखेती र श्रीदेव भट्टराई तथा सविन श्रेष्ठ प्यानलबाट छुल्ठिम गुरुङ, नवीनकुमार श्रेष्ठ, रश्मि भट्ट र सुलेमान इकु विजयी भए। सदस्य पदका १० मध्ये ६ जना उत्तम केसी प्यानलबाट र ४ जना सविन श्रेष्ठ प्यानलबाट विजयी भएका छन्।
नया कार्यसमितिको ७ पदका लागि १५ जना तथा १० सदस्य पदका लागि १८ जनाले उम्मेदवारी दिएका थिए। संघको विधानअनुसार निर्वाचनपछि निर्वाचित कार्यसमितिले थप १ जना उपाध्यक्ष र ३ जना सदस्य मनोनित गर्ने व्यवस्था छ। यस निर्वाचनमा संघका २ सय २१ साधारण सदस्य र ३ सय २५ आजीवन सदस्य गरी कुल ५ सय ४६ मतदाता मतदानका लागि योग्य थिए। तीमध्ये ३ सय ५६ मत खसेको थियो। निर्वाचनमा अधिवक्ता कृष्ण ढुंगाना प्रमुख निर्वाचन अधिकृत रहेका थिए।