निर्वाचन आयोगले विवादकाबिच धनुषा–१ मा नेपाली कम्युनिस्ट पार्टी (नेकपा) का उम्मेदवार मातृका यादवलाई प्रतिनिधिसभा सदस्य पदमा निर्वाचित भएको घोषण गरेको छ।
त्यस क्षेत्रमा रास्वपाका उम्मेदवार किशोरी साहको उम्मेदवारी खारेज भएपछि नेकपाका उम्मेदवार यादवले पाएको मतको आधारमा निर्वाचित घोषणा गरेको हो। निर्वाचनमा रास्वपालाई अत्यधिक मत आएपछि रास्वपाका उम्मेदवारले सर्वोच्च अदालतमा रिट हालेका थिए। तर सर्वोच्च अदालतले अन्तरिम आदेश जारी नगरेपछि आयोगले सोमबार प्रमाणपत्र हस्तान्तरण गरेको छ।
यादवले सात हजार ४२८ मत ल्याए भने नेकपा एमालेका उम्मेदवार रामचन्द्र मण्डलले ६ हजार ६०५ मत ल्याए। यद्यपि रास्वपाका उम्मेदवार साहले २० हजार ९१६ मत ल्याए पनि निर्वाचनअघि नै उम्मेदवारी खारेज भएपछि आयोगले त्यसको गणना गरेको छैन। सोमबार नै सर्वोच्च अदालतका न्यायाधीश नृपध्वज निरौलाको इजलासले आयोगको निर्णयविरुद्ध दायर गरेको रिटमाथि सुनुवाइ गर्दै विपक्षीसँग लिखित जवाफ माग गरेको छ। अदालतले आगामी सुनुवाइका लागि सम्बन्धित कागजात तथा फाइल झिकाउन पनि आदेश दिएको छ। निर्वाचन आयोगले निवेदकको उम्मेदवारी खारेज गर्ने निर्णयसम्बन्धी फाइल अदालतमा पेस गर्न भनेको छ।
‘अन्तरिम आदेश जारी हुने नहुने सम्बन्धमा निर्वाचन आयोगको समेत कुरा सुनी निवेदकको उम्मेदवारी खारेज गर्ने गरी भएको निर्णयसमेत हेरी निष्कर्षमा पुग्नु उपयुक्त हुने देखिएबाट सो प्रयोजनार्थ फागुन २९ गते प्राथमिकतामा पर्ने गरी पेसी तोकी सो छलफल पेसीमा विपक्षी आयोगको फागुन १८ को निवेदकको उम्मेदवारी खारेज गर्ने सम्बन्धी निर्णयसहितको फाइल लिई आउनू,’ आदेशमा भनिएको छ।
