संघीय संसद् अन्तर्गतको प्रतिनिधि सभाका विभिन्न समितिहरूको सभापति चयनका लागि शुक्रबार (भोलि) निर्वाचन हुने भएको छ।
प्रतिनिधि सभा नियमावली, २०७९ को नियम १७६ को उपनियम (१) बमोजिम सभामुख डिपी अर्यालले निर्वाचनको मिति तय गरेको संसद् सचिवालयले जनाएको छ।
सचिवालयले सार्वजनिक गरेको निर्वाचन कार्यक्रम अनुसार बिहीबार दिउँसो एक बजेदेखि चार बजेसम्म सिंहदरबारस्थित प्रतिनिधि सभा सचिवको कार्यकक्षमा उम्मेदवारी दर्ताको समय तोकिएको छ।
सभापति पदका लागि सम्बन्धित समितिको कुनै एक सदस्य प्रस्तावक र अर्को एक सदस्य समर्थक हुनुपर्ने व्यवस्था छ। उम्मेदवारी दर्ताका लागि उम्मेदवारको एक प्रति फोटो र नेपाली नागरिकताको प्रतिलिपि अनिवार्य गरिएको छ।
प्रतिनिधि सभाका सचिव हर्कराज राईले जारी गरेको निर्वाचन कार्य तालिका अनुसार सोही दिन बेलुका ४:३० बजे दर्ता भएका प्रस्तावहरूको सूची सचिवालयको सूचना पाटीमा प्रकाशन गरिनेछ।
शुक्रबार दिउँसो एक बजे सम्बन्धित समितिको बैठक कक्षमा प्रस्तावकले प्रस्ताव प्रस्तुत गर्ने र समर्थकले समर्थन गर्ने कार्यक्रम छ। त्यसपछि ती प्रस्तावहरूलाई नियमावली बमोजिम निर्णयार्थ प्रस्तुत गरिने निर्वाचन कार्यतालिकामा उल्लेख छ।
एकभन्दा बढी समितिमा पदेन सदस्य रहने मन्त्रीले निर्वाचनमा मतदान गर्ने भएमा आफूले मतदान गर्ने समितिको जानकारी २४ घण्टा अगावै लिखित रूपमा दिनुपर्ने व्यवस्था गरिएको छ।
समिति सभापतिको निर्वाचन कार्यक्रमसम्बन्धी सूचना हेर्नुस्
