काठमाडौं । नेपाल उद्योग वाणिज्य महासंघको आगामी २९ र ३० चैतमा हुने ६०औं वार्षिक साधारण सभा तथा निर्वाचनका लागि वस्तुगत तर्फको केन्द्रीय सदस्यमा सागर ढकालले उम्मेदवारी दिने घोषणा गरेका छन् ।
नेपाल स्टक ब्रोकर एसोसिएसनका अध्यक्ष ढकालले एसोसिएसनको तर्फबाट महासंघको वस्तुगत केन्द्रीय सदस्यमा उम्मेदवारी दिने घोषणा गरेका हुन् । जसका लागि एसोसिएसनको कार्यसमिति बैठकले सर्वसम्मति रूपमा अध्यक्ष ढकाललाई महासंघको केन्द्रीय सदस्यमा पठानाउने निर्णय गरेको थियो ।
एसोसिएसनको तर्फबाट महासंघ केन्द्रीय सदस्यमा निर्वाचन उठ्ने तयारीमा रहेका ढकालले नेपालको पुँजी बजारमा भएका विविध एजेन्डा समेत प्रस्तुत गरेका छन् । उनले हाल देशको पुँजी बजारमा ७२ लाख भन्दा बढी लगानीकर्ताहरू आबद्ध रहेको र अबको अर्थतन्त्रको मेरूदन्डको रूपमा पुँजी बजारलाई सशक्त ढंगले अघि बढाउने उद्देश्य अनुरुप स्टक ब्रोकर एसोसिएसको तर्फबाट आफूले महासंघको केन्द्रीय सदस्यमा उम्मेदवारी दिन लागेको जानकारी दिए ।
अहिले देशको पुँजीबजारको मार्केट क्याप करिब ५० खर्बको रहेको जानकारी गराउँदै उनले यसलाई नेपालको पुँजी बजार मात्र नभई समग्र अर्थतन्त्रको ऐनाको रूपमा अघि बढाउनुपर्ने भएकाले आफु महासंघमा जान लागेको बताए । ढकालले आफुले महासंघको यस निर्वाचनमा एसोसिएसनको तर्फबाट विविध एजेन्डा सहित प्रस्तुत हुन लागेको बताए । दुई वर्ष अघिदेखि नेपालको पुँजी बजारमा आबद्ध एसोसिएसनका अध्यक्ष ढकालको पुँजीबजारका साथै जलविद्युत्, होटल पर्यटन, कृषिलगायतका क्षेत्रमा सक्रियता छ । उनले आफू महासंघमा गएर स्वदेशी उद्योगी व्यवसायीको समस्या समाधानका लागि सरकारसँग नीतिगत पहल गर्न लाग्ने जानकारी दिए ।
जेन्जी आन्दोलनपछि फेरिएको नेपालको राजनीतिमा गत २१ फागुनको प्रतिनिधिसभा निर्वाचनबाट दुईतिहाइको नयाँ सरकार बन्ने क्रममा रहेको र अब प्रधानमन्त्री बालेन्द्र साहको नेतृत्वमा गठन हुने नयाँ सरकारलाई व्यवसायीका समस्या समाधान गरी माग सम्बोधन गराउन पनि आफुले महासंघको केन्द्रीय सदस्यमा उम्मेदवारी दिएको बताए ।
The post स्टक ब्रोकर एसोसिएसनबाट महासंघमा ढकालको उम्मेदवारी appeared first on राजधानी राष्ट्रिय दैनिक (लोकप्रिय राष्ट्रिय दैनिक)-RajdhaniDaily.com - Online Nepali News Portal-Latest Nepali Online News portal of Nepali Polities, economics, news, top stories, national, international, politics, sports, business, finance, entertainment, photo-gallery, audio, video and more....
