नेपाली कांग्रेसका महामन्त्री प्रदीप पौडेलले आम निर्वाचन २०८२ मा बहुमत हासिल गरेको भन्दै राष्ट्रिय स्वतन्त्र पार्टीका सभापति रवि लामिछाने र प्रधानमन्त्री उम्मेदवार बालेन्द्र शाहलाई बधाई दिएका छन्।
नेपाली कांग्रेसका महामन्त्री पौडेलले मंगलबार जारी गरेको सूचनामार्फत लामिछाने र शाहलाई सफल कार्यकालको शुभकामना व्यक्त गरेका हुन्।
उनले निर्वाचनको परिणामले अहिलेको व्यवस्थामै पनि बहुमत प्राप्त गर्न सकिने कुरा पुष्टि गरेको बताएका छन्। अब बन्ने सरकारले देश र जनताको हितमा काम गर्ने विश्वास व्यक्त गर्दै त्यस्ता सकारात्मक काममा कांग्रेसको साथ र समर्थन रहने प्रतिबद्धता उनले जनाएका छन्।
पौडेलले दीर्घकालीन महत्वका राष्ट्रिय मुद्दाहरूमा साझा सहमति निर्माण गर्न सबै राजनीतिक शक्तिलाई आह्वान पनि गरेका छन्।
उनले नयाँ सरकारलाई लोकतान्त्रिक मूल्य, सुशासन र राष्ट्रिय हितलाई प्राथमिकतामा राखेर काम गर्न आग्रह गरेका छन्।
