काठमाडौं । एमाले उपमहासचिव योगेश भट्टराईले चुनावमा पार्टीले लज्जास्पद हार बेहोरे पनि आफूहरू ढलेको तर नमरेका टिप्पणी गरेका छन् । निर्वाचनको समीक्षा गर्दै उनले पार्टी पंक्तिलाई निराश नबन्न आग्रह पनि गरेका छन् । उनले सही नीति, सही संगठन, सही नेतृत्व, सही व्यवहार र सही कार्यशैलीमार्फत आफूहरू फेरि उठ्ने बताएका छन् ।
निर्वाचनपछिको तीन दिनयता करिब हजारजनासँग फोनमा कुराकानी भएको र त्यतिकै संख्यामा म्यासेज हेरेको जानकारी दिँदै उनले कुराकानीका क्रममा सुझाब, टिप्पणी, विरोध, आक्रोश, हतासा, निरासा, सम्भावना, उपाय, दृढ़ता, जोशलगायतको मिश्रित र विविधतायुक्त धारणा पाएको उल्लेख गरेका छन् । ‘बोल्नु पर्यो, पहल लिनु पर्यो भनेर प्रेरणादायी अनि दबाबयुक्त कुरा पनि सुनेको छु । विस्तृतमा केही दिनपछि भन्ने छु,’ योगेशले सोमबार सामाजिक सञ्जालमार्फत आफ्ना विचारमा भनेका छन् ।
भट्टराईले निर्वाचनमा एमालेको अहिलेको अवस्था आउनुमा नेतृत्वमा बसेकाले जिम्मेवारी लिनुपर्ने बताएका छन् । उनले जनताले आफ्नो पार्टीको नीति र नेतृत्वलाई शान्तिपूर्ण रूपले अस्वीकृति गरेको टिप्पणी गरेका छन् । ‘निर्वाचनमा आफ्नो मतमार्फत जनताले हाम्रो नीति र नेतृत्वलाई शान्तिपूर्ण रूपमा अस्वीकृति गरेका छन् ।
यो आजको वस्तुगत यथार्थ हो । हामीले आफूभित्र सर्वाङ्गीण रूपान्तरणमार्फत जनसमर्थन पुनः आर्जनको बाटो लिनुपर्दछ,’ उनले लेखेका छन्, ‘मूलतः भाद्र २३ र २४ पछि हाम्रो पार्टीले लिएका नीति ठिक छैनन्, त्यसमा करेक्शन गरौं भनेर हामीले नेतृत्व र सिंगो पार्टीपंक्तिलाई बैठक, भेटघाट र महाधिवेशनमार्फत पटक पटक अनुरोध गर्यौ तर सफल भएनौ । अब पुन: छलफल र बहस खुला गर्नुपर्दछ ।’