प्रतिनिधिसभा सदस्य निर्वाचनको प्रत्यक्षतर्फ राष्ट्रिय स्वतन्त्र पार्टी (रास्वपा) का महिला उम्मेदवारहरूले ऐतिहासिक जित हासिल गरेका छन्। १११ सिटको नतिजा आउँदासम्म रास्वपाबाट ११ जना महिला उम्मेदवारहरूले पुराना र स्थापित राजनीतिक हस्तीहरूलाई भारी मतान्तरले पराजित गर्दै संसदको यात्रा तय गरेका हुन्।
रास्वपाका तर्फबाट झापा-२ मा इन्दिरा राना मगरले ६० हजार ११० मतसहित एमालेका देवराज घिमिरेलाई पराजित गरिन्। त्यस्तै, चितवन-३ मा सोविता गौतमले ५९ हजार २७७ मत ल्याएर माओवादीकी रेनु दाहाललाई स्तब्ध पारिन्। मोरङ-६ मा रुविना आचार्यले ५५ हजार ५१३ मत प्राप्त गर्दै कांग्रेसका प्रभावशाली नेता डा. शेखर कोइरालालाई भारी मतान्तरले पराजित गरिन्। झापा-१ मा निशा डाँगीले ४५ हजार ६८० मतसहित कांग्रेसका केशवराज पाण्डेलाई हराउँदै संसदमा युवा उपस्थितिको बलियो प्रमाण दिइन्।
ललितपुर-३ मा तोसिमा कार्की (४३ हजार ०९६), धादिङ-१ मा आसिका तामाङ (३९ हजार १२८) र कास्की-३ मा बिना गुरुङ (३७ हजार ७५०) मतका साथ निर्वाचित भएका छन्। यस्तै सर्लाही-१ मा नितिमा भण्डारी (४४ हजार १८१), मोरङ-५ मा आशा झा (३० हजार ४३४), कैलाली-१ मा कोमल ज्ञवाली (१७ हजार ८२६) र काठमाडौं-१ मा रञ्जु न्यौपाने (दर्शना) १५ हजार ४५५ मतसहित सानदार जित निकाल्न सफल भएका छन्। रास्वपाका अधिकांश महिला उम्मेदवारहरूले निकै फराकिलो मतान्तर कायम गरेका छन्।
नेपाली कांग्रेसका तर्फबाट भने दैलेख-१ मा बासना थापा १२ हजार ३७२ मतसहित विजयी भएकी छन्। उनले एमालेका रवीन्द्रराज शर्मालाई पराजित गरिन्। प्रत्यक्षतर्फ कूल ३ हजार ४०६ उम्मेदवारमध्ये ३८८ महिला चुनावी मैदानमा रहेका थिए।
