प्रतिनिधिसभा सदस्य निर्वाचन २०८२ अन्तर्गत लुम्बिनी प्रदेशका दुई महत्त्वपूर्ण निर्वाचन क्षेत्रमा राष्ट्रिय स्वतन्त्र पार्टी (रास्वपा) ले जित हासिल गरेको छ। बाँके निर्वाचन क्षेत्र नम्बर १ र रूपन्देही निर्वाचन क्षेत्र नम्बर ४ बाट रास्वपाका उम्मेदवारहरू भारी मतान्तरका साथ निर्वाचित भएका छन्।
बाँके निर्वाचन क्षेत्र नम्बर १ बाट ५६ वर्षीय सुरेश कुमार चौधरी ३२ हजार ७ सय ९२ मतका साथ विजयी भएका छन्। उनले आफ्ना निकटतम प्रतिस्पर्धी नेपाली कांग्रेसका नारायण प्रसाद गौडेललाई १७ हजार ४ सय ९१ मतको ठुलो अन्तरले पराजित गरे। गौडेलले १५ हजार ३ सय १ मत प्राप्त गर्दा नेकपा एमालेका सूर्य प्रसाद ढकाल ११ हजार ९५ मतमा सीमित भए।
त्यसैगरी, रूपन्देही निर्वाचन क्षेत्र नम्बर ४ बाट ३६ वर्षीय युवा उम्मेदवार कन्हैया बनिया २८ हजार ६६ मतका साथ विजयी भएका छन्। उनले नेकपा एमालेका प्रमोद कुमार यादवलाई ७ हजार ८ सय ४ मतको अन्तरले पछि पारे। यादवले २० हजार २ सय ६२ मत प्राप्त गरे भने नेपाली कांग्रेसका आशुतोष मिश्र १५ हजार ६ सय १३ मतका साथ तेस्रो स्थानमा रहे।
